«Прыгарніся да роднага слова»

З 17 па 18 лютага ў бібліятэцы праходзіў святочны марафон «Прыгарніся да роднага слова».

У бібліятэцы былі аформлены інфармацыйная зона «Хочаце верце, хочаце не», выстава-знаёмства «Скарбонка беларускіх слоўнікаў», выстава-развал «На роднай мове размаўляю».

За тыдзень да свята роднай мовы бібліятэка запусціла акцыю ў сацыяльных сетках «Я люблю чытаць на роднай мове», сутнасць якой заключалася ў тым, што ўдзельнікам прапаноўвалася запісаць відэа з чытаннем любімага твора на беларускай мове. Чытачы бібліятэкі з задавальненнем пачалі прымяраць на сабе ролі акцёраў і чытальнікаў, не засталіся ўбаку нават дзеці супрацоўнікаў бібліятэкі. Усе відэаработы можна паглядзець у сацыяльнай сетцы Instagram па хэштэгу #Ялюблючытацьнароднаймове.

Вучні 11 класа ДУА «Сярэдняя школа №27 г. Магілёва» прынялі ўдзел у інтэграваным уроку «Чароўная кветка беларускай паэзіі». Падчас мерапрыемства прагучалі песні беларускай бард-спявачкі Таццяны Беланогай «Бэз апаў”, «Не воблака, а проста аблачынка». Пад мелодыю беларускай песні «Старана мая азёрная» (словы Я. Янішчыц, муз. З. Яўтуховіча) вядучыя распавядалі прысутным пра лёс Яўгеніі Янішчыц, яе геніяльную паэзію. Пазнаёмілі з цікавымі і невядомымі фактамі з жыцця паэткі, зрабілі віртуальны экскурс па музею Я. Янішчыц, фонды якога налічваюць каля 700 экспанатаў, у тым ліку 650 арыгінальных. Разгледзелі і версіі трагічнай гібелі паэткі, а ў заключэнні ўрока прагледзелі дакументальную стужку пра жыццёвы і творчы шлях паэткі. Яўгенія Янішчыц пакінула нам шчырыя словы запавету: «Жывіце і любіце, свой беражыце дом», «…Пачынаецца ўсё з любві, а інакш і жыць немагчыма».

У гэтыя дні дзецям і дарослым было прапанавана адказаць на пытанні віктарыны «Знаўцы роднай мовы», разгадаць крыжаванкі і загадкі на роднай мове, перакласці словы з рускай мовы на беларускую, успомніць вядомых беларускіх пісьменнікаў і іх творы, а таксама, чытаць хуткамоўкі на роднай мове.

Далучыцца да Міжнароднага дня роднай мовы можна было і не выходзячы з дома. На сайце бібліятэкі https://gb2.csgpb.by/ і сацыяльных сетках былі  размешчаны не зусім звычайная анлайн-крыжаванка “У родным слове – цэлы свет”, пытанні былі на рускай мове, а адказ неабходна было даць на беларускай мове; павысіць моўны ўзровень прапанавалася у анлайн-гульне «Гаварыце па-беларуску, калі ласка», для гэтага неабходна з чатырох варыянтаў выбраць адзін правільны; у мазаіке слоў “Краіна, імя якой родная мова”  трэба было суаднесці карцінку з галоўнымі героямі беларускіх твораў да назвы твора.

Любіце, шануйце, паважайце родную мову, размаўляйце на ёй часцей!